Për shumë njerëz, blerja e një veture të re është mjaft e vështirë, andaj si alternativë zgjedhin të blejnë vetura të përdorura. Nëse keni vendosur të blini veturë të përdorur, përveç kostos, duhet të konsideroni edhe prishjet e mundshme.
Sigurohuni që të blini një veturë, koston e së cilës mund ta përballoni dhe lini një shumë parash rezervë për prishje apo për raste urgjente.
Ka shumë vende në të cilat mund të gjeni vetura të përdorura, duke përfshirë tregun e veturave, shitës privatë dhe kompani të ndryshme. Ju mund t’i shikoni ato edhe online përmes webfaqeve të ndryhme si veturaneshitje.com apo gazetave dhe revistave të shtypura, të cilat sot gjinden më rrallë.
Pasi ta keni gjetur veturën që po ju pëlqen, kontaktojeni shitësin sa më herët që të jetë e mundur gjatë ditës dhe caktoni një takim për ta shikuar veturën. Insistoni që ta shikoni veturën gjatë ditës sepse është e vështirë ta kontrolloni veturën gjatë natës. Pasi ta keni shikuar veturën, bëni një vozitje testuese dhe nëse ju konvenon çmimi i veturës, atëherë duhet t’i thoni shitësit se dëshironi ta dërgoni veturën tek një mekanik për ta kontrolluar. Mos e merrni për të vërtetë çdo gjë që thotë shitësi rreth veturës dhe po ashtu nuk duhet t’ju vijë turp që të kërkoni ta kontrolloni veturën tek një mekanik profesionist sepse ju jeni duke marrë një vendim të madh e të kushtueshëm. Kjo do t’ju ndihmojë t’i evitoni shumë probleme me veturën dhe po ashtu do t’ju kursejë edhe para.
Nëse shitësi nuk ju lejon ta vozisni veturën, atëherë kjo është një shenjë e qartë se nuk duhet ta blini atë veturë. Kontrollojeni veturën derisa është e parkuar dhe shikoni nëse ka ndonjë rrjedhje të caktuar dhe gjithashtu kontrollojeni edhe ngrohësin si dhe A/C. Në fund, asnjëherë mos nënshkruani një kontratë blerjeje në të cilën shkruhet: “vetura është kështu si është”.
Po ashtu, ajo që duhet të dini është se veturat e përdorura nuk kanë garancion. Edhe po të kishin, garancioni nuk mund të transferohet nga një pronar në tjetrin.
