Qeveria e Britanisë ka njoftuar se do të zhvendosë afatin kohor për ndalimin e shitjes së makinave me benzinë dhe naftë nga viti 2040 në 2035. Kjo u bë e ditur në një samit të Kombeve të Bashkuara për ndryshimet klimatike.
Mbretëria e Bashkuar kishte njoftuar më herët se do të ndalojë shitjen e makinave me benzinë dhe naftë nga viti 2040, kur të gjitha automjetet duhet të jenë plotësisht elektrike, si pjesë e një plani për të pastruar ndotjen e ajrit. Ky veprim u pasua pastaj me një veprim të ngjashëm nga qeveria franceze.
‘The times’ po ashtu njoftoi se do të ndalohet edhe shitja e veturave hibride që kanë motor të kombinuar elektrik apo me derivate (benzinë ose naftë). Qeveria britanike ka qenë nën presion të vazhdueshëm për të ndërmarrë masa për të zvogëluar ndotjen e ajrit pas humbjes së çështjeve ligjore me grupet e mbrojtjes së ambientit.
Ndërsa ‘Daily Mail’ bën të ditur se nëse cilësia e ajrit nuk përmirësohet, atëherë autoritetet do ta shqyrtojnë edhe mundësinë e denimit të vozitësve të makinave me naftë në rrugët më të ndotura gjatë vitit 2020.
Ndërsa më herët, Volvo u bë prodhuesi i parë tradicional që vendosi një datë për heqjen e automjeteve me djegie të karburantit. Volvo, qysh më herët pati bërë të ditur se pas vitit 2019 do të prodhojë vetëm vetura hibride apo elektrike.