Mënyrat e shitjes së veturave, kohëve të fundit kanë ndryshuar shumë, nga ato klasike të daljes në treg, tek ato të shitjes online përmes të specializuara ueb faqeve për shitjen e veturave.
Koha e njerëzve është kufizuar aq shumë, sa që ata nuk dalin më fizikisht në treg të veturave apo auto sallone për të shikuar ndonjë veturë potenciale për blerje, por fillimisht hulumtojnë online nëpër ueb faqet për shitje të veturave, të shpalljeve të përgjithshme apo të kompanive, e vetëm pastaj, pasi t’u ketë pëlqyer ndonjë veturë shkojnë ta shikojnë atë edhe fizikisht.
Andaj është me rëndësi që edhe kur ta publikoni veturën tuaj për ta shitur në këto ueb faqe, ta bëni atë mirë që të tërhiqni sa më shumë blerës potencialë, e t’i evitoni disa gabime që mund të ndikojnë që blerësit e mundshëm të mos ndalen tek shpallja juaj por të kalojnë në shpalljen tjetër.
Gjëja e parë që bie në sy tek një shpallje e një veture është fotografia. Fotografitë apo videot e mira të veturës ndikojnë jashtëzakonisht shumë në rritjen e mundësisë së shitjes së veturës suaj. Ato duhet të shfaqin pjesën më të bukur të veturës, të jenë të mëdha për nga rezolucioni dhe të jenë kualitet. Ato duhet të bëhen nga disa kënde që t’i shfaqin të gjitha këndet e veturës dhe po ashtu ta bëni edhe ndonjë fotografi për pjesën e brendshme.
Në anën tjetër, fotografitë e vogla, ose ato që janë zmadhuar shumë përtej rezolucionit origjinal dhe që janë shumë të turbullta si shkak i kualitetit të ulët janë një nga gabimet që i bëjnë shitësit gjatë publikimit, e të cilat e bëjnë një blerës të irritohet e të mos ndalet në shpalljen e veturës suaj. Nuk do të thotë se të jeni fotograf profesionist, mjafton edhe kualiteti i fotografive të telefonit tuaj, vetëm se duhet t’i kushtoni pak vëmendje apo ta pyesni ndonjë familjar ose shok se si mos ta humbni kualitetin e fotografisë. Në anën tjetër as nuk duhet të jenë shumë të edituara përmes programeve të dizajnit, sepse kur blerësi ta shohë edhe fizikisht veturën, do të vërejë një dallim të madh dhe do të pendohet e nuk do ta blejë atë pasi do të ndihet i mashtruar. Përveç disa fotografive të veturës të bëra nga disa kënde, është me rëndësi t’i fotografoni edhe pjesët shtesë, si goma rezervë apo të ato të dimrit, garancioni i prodhuesit (nëse e keni) si dhe libri i servisit, të cilat kanë shumë rëndësi për një blerës.
Nëse blerësit potencial, ia kanë tërhequr vëmendjen vetura juaj dhe mënyra e paraqitjes së saj përmes fotografive apo videove, ajo që do të kërkojë janë informacionet dhe të dhënat e veturës. Prandaj është me rëndësi që kur ta publikoni veturën tuaj për shitje, t’i shkruani edhe të dhënat kryesore të veturës e mos ta leni vetëm me fotografi. Nëse nuk i dini saktë të dhënat, atëherë mundohuni t’i gjeni në manualin e veturës, apo edhe më lehtë e keni t’i gjeni në internet tek ueb faqja e prodhuesit të makinës suaj.
Një tjetër gjë që duhet kushtuar kujdes është lënia e kontaktit në shpallje dhe përgjigja ndaj telefonatave dhe mesazheve të të interesuarve. Sado që ta përshkruani mirë veturën dhe t’i keni publikuar të dhënat e saj, gjithmonë do të ketë njerëz që sërish do t’ju pyesin për disa të dhëna të veturës si dhe për çmimin, andaj mos hezitoni që të përgjigjeni dhe mundësisht ta bëni atë shpejtë, ngase blerësit hezitojnë ta blejnë një veturë nga shitësi i cili nuk u përgjigjet pyetjeve dhe mesazheve.
Duhet shfrytëzuar dhe kushtuar kujdes këtyre detajeve ngase të gjitha këto janë falas dhe janë një mundësi e mirë që ta shisni veturën tuaj pa shpenzuar asnjë cent. Në anën tjetër, ekziston edhe mundësia e pagesës së shërbimeve për fotografimin e veturës në mënyrë profesionale dhe veçimin e shpalljes për të qëndruar më gjatë në pjesën e sipërme në mënyrë që bie më shumë në sy të njerëzve. Këto shërbime që ofrohen edhe nga ueb faqja jonë vetunashitje.com padyshim nuk janë të domosdoshme, vetëm janë një shtesë dhe mundësi e mirë e rritjes së gjasave për ta shitur më shpejtë e pa u lodhur veturën tuaj.