Disa shoferë gjatë vozitjes kur kanë nevojë të kalojnë nga një pedale në tjetrën (shembull, nga freni tek gasi), e ngrejnë gjithë këmbën nga dyshemeja për të kaluar në pedalen tjetër.
Por kjo nuk është një praktikë e mirë sepse ju ngadalëson paksa dhe ju bën më pak efikas. Megjithëse mund të mos ju duket shumë dallim i madh, por edhe milisekondat luajnë rol shumë të rëndësishëm në situata kritike dhe të rrezikshme. Po ashtu këmba juaj mund të rrëshqasë, andaj është shumë me rëndësi që gjatë kalimit nga një pedale në tjetrën, thembra e këmbës suaj të mbetet në dysheme (mes dy pedaleve) dhe vetëm ta lëvizni anash këmbën tuaj për ta ndryshuar pedalen. Sigurisht për ta aplikuar këtë teknikë, kjo varet paksa edhe nga madhësia e këmbës suaj si dhe nga distanca mes pedaleve të veturës suaj.
Po ashtu, këmba e majtë nuk duhet të qëndrojë vazhdimisht mbi pedalen e koplugut sepse këmba juaj do të lodhet, andaj duhet ta vendosni atë në pushimoren që është pikërisht për ta pushuar këmbën dhe ta vendosni te pedalja e koplugut vetëm kur duhet t’i ndryshoni shpejtësitë.