Mos u mashtroni nga pagesa me këste të ulëta!


Mos u mashtroni nga pagesa me këste të ulëta!

Një nga strategjitë e zakonshme dhe të suksesshme të shitjes është që kompanitë ta përqendrojnë blerësin tek mënyra e pagesës me këste mujore. Nëse i keni mundësitë dhe paratë e mjaftueshme për ta blerë përnjëherë veturën që ju nevojitet, mos insistoni që ta blini veturën me këste.

Bërja e llogarive se sa para do t’i shpenzoni në muaj për blerjen e veturës me këste (derisa ju i keni paratë e gatshme për ta blerë veturën përnjëherë) është mënyra më e keqe për ta blerë një veturë.

Kur ju përqendroheni tek pagesa me këste, shitësi apo menaxheri i shitjes e ka të lehtë të manipulojë me ‘shifrat e ulëta’ që do të paguani nëse vendosni ta blini veturën me këste për 7 apo 8 vite. Në shikim të parë, vërtetë mund të duken shifra të ulëta, por nëse i mblidhni të gjitha ato shifra të kësteve dhe kamatës që e aplikojnë kompanitë, atëherë i bie që ju po paguani mjaft shtrenjtë mbi çmimin real të tregut.

Ja një shembull se si veprojnë kompanitë. Nëse ju blini një veturë të shtrenjtë me çmim 30 000€ me këste për 5 vite, atëherë pagesa mujore me kamatë 5% i bie që të jetë 566€. Shumëzojeni shumën e këstit mujor 566€ x 60 muaj dhe pastaj e shihni se ju do të paguani 33 960€, apo 3 960€ më shumë.  Nëse e paguani për kohë akoma më të gjatë, shembull për 7 vite ta zëmë me 6% kamatë (që në realitet mund të jetë akoma më e lartë), shuma mujore e pagesës do të zvogëlohet në 438€ që është një vlerë shumë më e vogël se 566€, por në rast se e shumëzoni vlerën 438€ me 84 muaj, do ta vëreni se në fund ju do të paguani 36 792€ në total, apo 6 792€ më shumë se sa çmimi normal.

Andaj në çdo situatë është më mirë që t’u ikni blerjeve me kamatë, sepse ajo që shitësit do të veprojnë është që t’jua ulin çmimin mujor të pagesës, por do ta rrisin kamatën, që në fund ta paguani një shumë bukur më të madhe.

Po të keni ndonjë të afërm apo mik që do t’ua huazojë paratë pa interes, do të ishte shkëlqyeshëm, apo në raste të tjera, nëse keni disa para të kursyera, prisni edhe pak derisa t’i bëni paratë e mjaftueshme.

Është më mirë që të prisni kohën kur kompanitë nuk shesin edhe aq vetura por planifikojnë të prodhojnë vetura të reja, sepse kjo është koha kur kompanitë lëshojnë oferta me ulje të mëdha çmimesh apo edhe blerje me këste pa kamatë, e cila shpeshherë bëhet shkak për përkeqësimin e gjendjes financiare personale apo familjare.

Pagesa-me-keste

Shpërndaje:

Veturat në shitje