Volkswagen Group është duke luftuar lidhjen e padëshiruar me partinë e ekstremit të djathtë në Gjermani (AfD), e cila po e zhvillon kongresin e saj kombëtar pikërisht në sallën që e mban emrin e kompanisë së mirënjohur të automjeteve.
Volkswagen ka kërkuar nga operatori i arenës që të mbulojë logon e kompanisë gjatë fushatës anti–emigrim të partisë së djathtë ekstreme në Volkswagen Halle (Braunschweig), afër Wolfsburg-ut, ku edhe e ka bazën VW.
Pas skandalit me emetimin e gazërave, lidhja me partinë e ekstremit të djathtë, ndonëse e jo e qëllimshme është një tjetër imazh jo i mirë për kompaninë.
Kompania u themelua më 1937 nga nazistët për të zhvilluar një "Volkswagen" (makinë të njerëzve), ndërsa një vit më pas, Adolf Hitler mbajti një fjalim para një turme prej më shumë se 50,000 njerëzve gjatë ceremonisë për fillimin e ndërtimit të fabrikës kryesore të VW në qytetin që pas Luftës së Dytë Botërore u quajt Wolfsburg. Pikërisht për shkak të kësaj historie, kompania vazhdimisht ka qenë e ekspozuar ndaj lidhjeve që njerëzit ia bëjnë me nazistët.
Volkswagen numëron 650,000 të punësuar në 122 fabrika në të gjithë botën.