Që ta mbroni veten, familjen tuaj, automobilin dhe të gjithë pjesëmarrësit në komunikacion duhet t’i keni të vendosura në këtë periudhë gomat e dimrit, pa marrë parasysh që me ligj është precizuar përdorimi i detyrueshëm i gomave të dimrit që nga 1 nëntori deri më 1 prill, në kohën kur kemi rënie të borës apo kur në rrugë ka akull.
“Shkrijnë” akullin
Gomat e dimrit janë të konstruktuara në atë mënyrë që kullojnë, largojnë ujin nën to dhe kështu edhe zvogëlojnë rrezikun nga ndonjë aksident i mundshëm.
Nxehtësia që krijohet me rastin e lëvizjes së gomave, pra me rastin e kontaktit të tyre me sipërfaqen e rrugës, i shkrin majat e kristaleve të akullit dhe e bën, e krijon një shtresë të hollë të ujit që është e rrëshqitshme.
Poret e imëta që gjenden në to nga hapësira që e shkelin gomat e largojnë ujin, apo më mirë e shpërndajnë nga rruga me çka sigurohet stabilitet i makinës në rrugë. Kanë një përputhje dhe përshtaten më mirë me hapësirën e rrugës dhe ofrojnë rrugë më të shkurtër me rastin e frenimit falë kanaleve më të gjera që gjenden në goma. Në akull, me gomat e verës, me rastin e shpejtësisë prej 30 km/h, rruga e frenimit është 68 metra, ndërsa me gomat e dimrit është 57 metra, plotësisht e mjaftueshme që të shmanget aksidenti!
Edhe për rrugën e tharë
Gomat e dimrit janë të bëra nga përzierja e veçantë duke i shtuar edhe silic, që përshtatet me temperaturat e ulëta dhe ofron ngasje të qetë dhe të rehatshme. Për dallim nga gomat e verës, ato të dimrit nuk forcohen me rastin e temperaturave të ulëta. Duhet theksuar se gomat e dimrit nuk shërbejnë vetëm për borë dhe akull por edhe për rrugën e tharë, më saktë sapo temperaturat të bien nën 7 gradë celsius.
Një përllogaritje e thjeshtë tregon se më mirë është të përdorni gomat e verës në verë, ndërsa ato të dimrit në dimër dhe kështu do të kurseni. Rekomandohet vendosja e të gjitha gomave të dimrit në katër rrotat pasi që në të kundërtën mund të vijë deri te bartja dhe rrëshqitja e makinës nëpër kthesa. Me to do të keni ngasje më të shpejtë, më të rehatshme dhe të sigurt, dhe nuk do të paguani asgjë më shumë. Nga ana tjetër asgjë nuk vlen më shumë sesa siguria juaj personale, apo jo. /autolajme.com