Edhe vozitësit më me përvojë nuk i dinë të gjitha nuancat dhe detajet të cilat e bëjnë të lehtë vozitjen. Ndërsa nëse jeni vozitës i ri, ju keni nevojë për pak kohë që të ambientoheni, të liroheni nga stresi i vozitjes në trafik të rënduar e të tjera situata.
Andaj për t’ia lehtësuar e thjeshtësuar vetes dhe për të shpëtuar nga gjitha ato telashe, duhet t'i mësoni disa teknika të thjeshta por shumë të nevojshme e të rëndësishme se si ta eliminoni këndin e vdekur (në të cilin nuk shihet vetura që ndodhet anash dhe pak prapa jush), parkimin e saktë, se çfarë nuk duhet të bëni kur futeni në kthesë dhe ta dini se çfarë funksionesh kanë butonat që gjenden në veturën tuaj.
Sigurisht kur e merrni patent shoferin, ju keni dëshirë vetëm të vozisni dhe që të dilni për një xhiro me shoqërinë tuaj e të festoni. Për ta bërë këtë do të keni kohë dhe mundësi, por gjëja e parë dhe më e rëndësishme për ta bërë është që të ambientoheni dhe ta mësoni veturën tuaj se si funksionon. Kjo do t’ju ndihmojë që ta dini se çfarë funksioni ka çdo buton në veturën tuaj, në mënyrë që gjatë vozitjes të dini se ku ndizen dritat e gjata, ato të mjegullës apo opsionet tjera që mund t’ju duhen. Sa më shumë që e njihni veturën tuaj, aq më pak stres do të keni kur dilni në rrugë në çfarëdo kushtesh dhe trafiku të rënduar.