A e mbani mend se sa ngadalë dhe me kujdes keni vozitur kur e keni marrë patent shoferin? Eh, gjatë dimrit është e nevojshme pikërisht një vozitje e tillë, madje edhe më me kujdes.
Kur të frenoni duhet të paramendoni që poshtë pedales keni vezë të cilat do të thyhen nëse e shkelni pedalen e frenimit shumë dhe shpejtë. Edhe pse i keni gomat e reja dhe të mira të dimrit, vozitja e shpejtë, pa kujdes dhe tejkalimi i mundësive reale të gomave do të rezultojë me rrëshqitje të veturës, rrotullim apo përplasje. Kjo do të thotë që duhet t’i parashikoni kthesat, ndalesat apo kodrat për të qenë të përgatitur dhe për ta mbajtur ritmin në nivel të duhur e të qetë për të shmangur rrezikun. Po ashtu, duhet të mos nguteni veçanërisht të hyni ngadalë në kthesa apo gjysmë kthim në të cilat duhet të merrni hark më të madh, sepse në borë kthimi i rrotave të veturës është më i vështirë dhe kërkon më shumë hapësirë. Në të kundërtën, rrotat tuaja do të kthehen në ‘snowboard’.
Në kushte të vështira dimri, është mirë që të mos bëni disa veprime në të njëjtën kohë me gomat tuaja. Kjo nënkupton që duhet të frenoni atëherë kur vetura juaj është duke lëvizur drejtë në mënyrë që të evitoni sa më shumë që të jetë e mundur frenimet në kthesa. Thjeshtë uleni shpejtësinë para kthesës, në mënyrë që gjatë hyrjes në ndonjë kthesë të vështirë të mos keni nevojë të frenoni, apo në rast nevoje të frenoni vetëm pak, ngadalë dhe me kujdes.
Nëse keni veturë të re me opsione të avancuara, është mirë që gjatë dimrit të mos e përdorni sistemin gjysmë automatik të vozitjes, ngase stuhitë e borës i mbulojnë shënjuesit, sinjalizimet dhe vijat e rrugës si dhe mund t’i bllokojnë senzorët e veturës suaj. Kjo pastaj shkakton që sistemi i vozitjes gjysmë automatike të mos e njohë rrugën, andaj vozitësit duhet të qëndrojnë plotësisht të përqendruar në rrugë dhe timon.