Teknologjitë e fundit të implementuara në veturat e sotme shtojnë sigurinë dhe janë zhvilluar me qëllimin që t’i evitojnë aksidentet dhe të shpëtojnë jetë.
Me gjithë teknologjinë e avancuar që i bën veturat e sotme më të avancuara se kurrë, megjithatë ato voziten nga njerëzit që jo rrallë bëjnë gabime të pafalshme që nuk do të duhej t’i bënin.
Një nga gabimet që nuk do të duhej ta bëjmë është që kur të shpërthen goma, të mos bëjmë panik duke u munduar të frenojmë sa më shpejtë që mundemi e ta ndalim veturën menjëherë. Në disa situata të caktuara, frenimi do të ishte krejt në rregull, por të frenosh pas shpërthimit të gomës në një shpejtësi prej 100 kilometrash në orë në autostradë është e rrezikshme dhe mund t’ju kushtojë me humbje të kontrollit të makinës, ndeshje, dalje nga rruga apo edhe rrotullim të veturës. Në rrethana të tilla, një shpërthim gome mund t’ju duket sikur keni shkelur në një zonë të minuar dhe makina do të fillojë të dridhet, gjë që është normale të shkaktojë panik, por kjo nuk duhet të ndikojë që instinktivisht ta shkelni frenin ngase do të rrezikoni shumë. Në vend të kësaj shkeleni gazin dhe vazhdoni t’i jepni makinës për disa sekonda dhe mbajeni timonin sa më drejtë që mundeni derisa vetura të stabilizohet dhe pastaj tentoni ta ulni shpejtësinë gradualisht që të ndaleni.