Në vendin tonë ekzistojnë një numër i madh i bizneseve të cilat merren me servisimin dhe shitjen e pjesëve të përdorura për vetura. Këto biznese, për ushtrimin e veprimtarisë së tyre, kanë nevojë që të sigurojnë pjesë të ndryshme të përdorura për veturat që servisojnë. Këtë ato mund ta bëjnë duke importuar nga vendet e ndryshme, qoftë të BE-së, qoftë nga shtetet e rajonit, mirëpo si pjesë të shkatërruara në shtetet përkatëse prej nga vijnë.
Ndërsa për veturat që gjenden në Kosovë me targa të huaja, por që janë të aksidentuara, ose me defekte, Dogana e Kosovës nuk lejon shkatërrimin e tyre nën mbikëqyrjen e zyrtarëve doganorë dhe pastaj doganimin e pjesëve të përdorshme. Sipas Doganës, duhet që fillimisht të bëhet doganimi i veturave (të aksidentuara ose me defekte) në procedurë të rregullt, duke i paguar taksat doganore, tvsh-në dhe akcizën, sikurse ato të ishin në gjendje të rregullt, e pastaj importuesi të vendos se a dëshiron të regjistroj dhe të përdor automjetin, ose të shkatërroj atë për pjesë.
Si më lartë Dogana e Kosovës, nuk e lejon shkatërrimin e veturave nën mbikëqyrjen doganore dhe doganimin e pjesëve të përdorshme, duke mundësuar vetëm procedurën e rregullt të doganimit për veturat si tërësi, megjithëse bëhet fjalë për vetura me defekte ose të aksidentuara dhe mund të kenë shumë pjesë të papërdorshme.
Kërkesa të tilla, pra për lejimin e doganimit të pjesëve të përdorshme të veturave pas mbikëqyrjes së shkatërrimit, Doganës së Kosovës i janë drejtuar shumë biznese, por kërkesat e tilla janë refuzuar. Disa nga bizneset (të përfaqësuara nga B2B Consulting) kanë atakuar këto vendime në Gjykatën Themelore të Prishtinës / D.A – Divizioni Fiskal, duke shpresuar që vendimet arbitrare të Doganës të shqyrtohen në mënyrë objektive, në atë mënyrë që të detyrohet Dogana e Kosovës - të lejoj doganimin e pjesëve të përdorshme të veturave, pas mbikëqyrjes së shkatërrimit, siç lejohet në secilin shtet të BE-së dhe rajonit, prej nga edhe importohen ato pjesë në Kosovë.
Derisa të ekzistojë një ndalesë e tillë nga Dogana e Kosovës, bizneset kosovare vazhdojnë të diskriminohen, pasi që nuk mund të ushtrojnë një veprimtari, e cila ushtrohet lirshëm kudo. Vazhdon edhe më tutje të nxitet kontrabanda, sepse bizneset duhet të sigurojnë pjesë të përdorura që ju nevojiten dhe qytetarët detyrohen të paguajnë çmime më shtrenjta për këto shërbime, ose të blejnë imitime të pjesëve të reja.
Burimi: B2B consulting