Hamilton fiton titullin e 6-të në Formula 1

Piloti britanik i skuderisë Mercedes, Lewis Hamilton, e ka fituar titullin e 6-të të kampionit në Formula 1. Në garën e së dielës për Shpërblimin e Madh të SHBA, ai e zuri vendin e dytë, por kjo i mjaftoi që të shpallej kampion me gjithsej 363 pikë.

Ai ka plot 74 pikë më shumë se shoku i skuadrës Valteri Bottas, ndërkohë deri në fund të sezonit kanë ngelur edhe dy gara për t’u zhvilluar, ajo e Brazilit më 17 nëntor dhe ajo e Abu Dhabi në Emiratet e Bashkuara Arabe me 1 dhjetor. Me titullin e 6-të të fituar, Hamilton i është afruar legjendës së Formula 1, Michael Schumaher, i cili ka 7 tituj kampioni dhe britaniku tashmë është vetëm një titull larg gjermanit.