Si shumë prej kompanive, edhe Toyota është përqendruar në prodhimin e veturave elektrike. Për ta bërë një portfolio të re të automjeteve elektrike më pak të kushtueshme për t'u prodhuar dhe më efikase për t’u ndërtuar, Toyota ka krijuar një platformë të quajtur e-TNGA (Toyota New Global Architecture).
Inxhinieri dhe udhëheqësi i projektit Koji Toyoshima deklaroi se ideja është që pjesët e makinës të prodhohen në module dhe blloqe ndërtimi që mund të kombinohen me lloje dhe trupa të ndryshme makinash. “Ajo që propozova ishte një ide për një platformë të makinave ku ju keni një bateri, motor dhe shasi që mund të kombinohen për të prodhuar lloje të ndryshme të automjeteve”, tha Toyoshima.
Platforma mund të shkallëzohet lart ose poshtë për të krijuar automjete të vogla, të mesme dhe të mëdha. Moduli i qendrës kontrollon madhësinë dhe mund të zgjerohet për të akomoduar bateri më të mëdha. Bateritë do të jenë nga 50 kWh deri 100 kWh që do të vendosen në dy lloje motorësh, të vegjël dhe të mëdhenj.