Kompania e mirënjohur për vetura elektrike, planifikon të ndërtojë një fabrikë në Gjermani, konkretisht në afërsi të Berlinit. Kështu është shprehur kryeshefi ekzekutiv i Tesla-s, Elon Musk, duke iu dërguar një mesazh të fuqishëm kompanive rivale gjermane, se ai nuk ka frikë nga konkurrenca dhe ka ardhur në shtëpinë e tyre.
“Tesla gjithashtu do të ndërtojë edhe një qendër inxhinerike projektimi dhe dizajni në afërsi të aeroportit të ri në afërsi të kryeqytetit gjerman”, tha Musk gjatë qëndrimit sa ishte në Gjermani për të pranuar një çmim të fituar për ‘Model 3’ që mposhti konkurrentë të mëdhenj si BMW 3 series dhe Audi A4.
“Disa nga veturat më të mira në botë janë bërë në Gjermani”, tha Musk në ceremoninë e çmimeve të “Golden Steering Wheel” ku u paraqitën edhe udhëheqësit e Volkswagen, Audi dhe BMW.
Në fabrikën e re në Berlin do të prodhohen bateri dhe makina të ndryshme, edhe prej atyre që tashmë janë në treg duke filluar nga Model Y dhe Model 3 që do të prodhohet më vonë.