Tesla shet 146 000 Cybertruck për 48 orë

Kryeshefi ekzekutiv i kompanisë së mirënjohur Tesla, Elon Musk, ka thënë se për më pak se 48 orë janë bërë më shumë se 146 000 porosi të modelit të ri Cybertruck. Interesimin dhe numrin e madh të porosive nuk e uli as thyerja e xhamit gjatë prezantimit të Cybertruck.

Webfaqja e Tesla-s u mundëson klientëve ta porosisin kamionetën elektrike sipas konfigurimit të tyre të preferuar, ndërsa prodhimi i Cybertruck do të fillojë vetëm në vitin 2021. Në llogarinë e tij personale në Twitter, Musk tha se 42% e kanë porositur modelin me dy motorë, që kushton 49 000 dollarë, 41% e porositën modelin me tre motorë (i cili do të fillojë të prodhohet më 2022) që kushon 69 000 dollarë, ndërsa vetëm 17% e kanë porositur modelin me një motor të vetëm që kushton 39 000 dollarë.

Tesla e prodhoi veturën elektrike Cybertruck duke u inspiruar në filmin ‘Blade Runner’ dhe duket që modeli është pëlqyer shumë nga klientët e Tesla që po vazhdojnë ta porosisin këtë model