Kompania Uber planifikon ta testojë një tipar të ri të sigurisë që lejon pasagjerët dhe shoferët të regjistrojnë bisedat e tyre dhe t'ia dërgojnë ato shërbimit ‘rideshare’.
Një test i këtij opsioni është planifikuar të fillojë muajin tjetër në Brazil dhe Meksikë, me mundësinë e zgjerimit edhe në vendet tjera.
Kjo masë vjen pas shqetësimeve të vazhdueshme për sigurinë dhe raportimet e sulmeve dhe ngacmimeve në automjetet ‘rideshare’.
“Ky opsion do të na ndihmojë ta kuptojmë se çfarë ndodhi brenda automjetit gjatë udhëtimit (në rast të ndonjë problemi të mundshëm)," tha Drejtori i produkteve të sigurisë në Uber, Sachin Kansal.
Regjistrimi i bisedave mund të ndihmojë në sqarimin e fakteve dhe rrethanave të një mosmarrëveshjeje, por gjithashtu mund të krijojë edhe probleme rreth privatësisë.
Audio e regjistruar me aplikacionin e Uber për telefona të mençur është enkriptuar dhe mbetet në pajisje derisa udhëtari apo shoferi të vendosin t’ia dërgojnë atë kompanisë.
Në fund të udhëtimit, aplikacioni i Uber do të pyesë nëse ka pasur ndonjë problem gjatë udhëtimit dhe udhëtari apo shoferi dëshiron ta dërgojë audion.
Audio nuk mund të ridëgjohet nga shoferi apo udhëtari, por Uber e ka mundësinë e hapjes së audiove të enkriptuara.