E kemi dëgjuar me mijëra herë se shkrimi i mesazheve dhe përdorimi i telefonit gjatë vozitjes është shumë i rrezikshëm. Megjithatë shumë njerëz vazhdojnë ta përdorin telefonin celular gjatë vozitjes duke e rrezikuar jo vetëm veten e tyre, por edhe të njerëzve të tjerë.
Andaj, Australia ka vendosur që të bëjë diçka në këtë drejtim duke zhvilluar një sistem të bazuar në inteligjencën artificiale. Kamerat janë ndërtuar në atë mënyrë që të kapin vozitësit të cilët e përdorin telefonin e tyre gjatë vozitjes së automjetit.
Departamenti i transportit në Australi e ka testuar sistemin në dy pika, ndërsa tani është duke i shpenzuar 88 milionë dollarë për t’i instaluar kamerat në 45 pika të tjera. Gjatë testimit të këtij sistemi, rreth 8.5 milionë makina janë ekzaminuar, ndërsa rreth 100 000 vozitës janë zënë duke i përdorur telefonat gjatë vozitjes. Ata janë zënë duke shkruar mesazhe, duke i përdorur rrjetet sociale, e disa shoferë madje janë zënë duke e mbajtur telefonin me të dy duart dhe duke e lëshuar timonin tërësisht nga duart për të shkruar një mesazh apo postim ‘me rëndësi’
Ministri i Transportit Andrew Constance tha se qëllimi i Qeverisë australiane nuk ishte t’i gjobisë njerëzit por të shpëtojë jetën e tyre.