Mos njohja e vlerës reale të makinës ju humb para gjatë shitjes

Shpeshherë për të blerë një veturë tjetër, duhet ta shesim veturën e vjetër që kemi dhe normalisht prej shitjes së saj duhet të nxjerrim një shumë të caktuar për ta mbuluar një pjesë të vlerës së makinës së re.

Por duke mos e ditur vlerën reale të veturës sonë, ne mund të dëmtohemi keq kur ia caktojmë çmimin veturës dhe kur negociojmë shitjen  e saj.  Nuk mund ta caktojmë çmimin e duhur pa e ditur vlerën e përafërt të makinës sonë, por fatmirësisht ka disa mënyra për ta kuptuar atë. Shumë webfaqe të automjeteve kanë implementuar vegla të vlerësimit të veturave dhe të pjesëve të tyre.

Për t’ia vendosur çmimin sa më të saktë, sigurohuni që në veglën e vlerësimit të veturave t’i shënoni saktë kilometrat, gjendjen si dhe opsionet që vetura juaj i ka fabrikisht.

Një tjetër mënyrë për ta mësuar vlerën e makinës suaj është që të shkoni në tregun e makinave të përdorura dhe të hulumtoni se sa kërkojnë shitësit tjerë për një makinë të ngjashme me tuajën.

Megjithatë ju duhet të qëndroni i përgatitur sepse gjithmonë ka dallim mes çmimit të shitjes dhe ofertës për ta blerë, andaj një njohje e mirë e makinës suaj, vlerës reale të saj dhe një negocim i mirë, mund të bëjnë që ta shisni veturën për një çmim të kënaqshëm.