2019-ta ka qenë viti në të cilin shumë prej kompanive të automobilave kanë njoftuar për prodhimin e veturave të para elektrike. Ditë më parë edhe shteti turk, e prezantoi makinën e parë elektrike, e cila është zhvilluar nga Grupi i Iniciativës Automobilistike (TOGG).
Ky automobil, ka një teknologji të tillë që brenda 30 minutave do të arrijë 80% të kapacitetit të karikimit.
Me platformën modulare elektrike automobili do të ketë dy opsione, 300+ dhe 500+ kilometra distancë me një karikim, ndërsa do të jetë i kyçur vazhdimisht me qendër dhe përditësimet do të mund të bëhen nëpërmjet lidhjes 4G dhe 5G.
Menaxhimi i avancuar i baterisë dhe sistemet aktive të administrimit termik sigurojnë një makinë me bateri afatgjatë, ndërkaq shpejtësinë nga 0-100 km/h motori me 200 kuaj fuqi arrin për 7,6 sekonda, ndërsa modeli me motor 400 kuaj fuqi arrin për 4,8 sekonda.
Infrastruktura e lidhjes së automobilit turk është e tillë që nuk ka nevojë për ndonjë pajisje të veçantë për t’u lidhur në internet.
Makina do të jetë në komunikim me të gjithë infrastrukturën inteligjente të qytetit, rrjetin elektrik, pajisjet, shtëpitë dhe ndërtesat si dhe do të bëhet një asistent në shumë fusha të ndryshme të jetës.
