Si ta ndezim veturën në ditë të ftohta dimri?

Gjatë dimrit kur temperaturat bien nën 0 gradë celsius, ju mund të hasni në vështirësi ta ndizni veturën tuaj. Shumë njerëz kanë probleme ta ndezin veturën gjatë dimrit, veçanërisht nëse nuk e kanë vozitur atë për disa ditë me radhë. Andaj ju duhet të jeni të përgatitur që gjatë dimrit të përballeni me probleme të ndryshme.

Akumulatori

Nëse makina juaj nuk ndizet, provoni përsëri pas 5 apo 10 sekondash dhe nëse sërish nuk ndizet provoni pas 1 minuti, por duhet të keni kujdes që të mos tentoni shumë shpesh ngase mund ta harxhoni baterinë, akumulatorin. Pasi që tentimet e dështuara e harxhojnë baterinë, fikni elektronikën e veturës. Sigurohuni që dritat, radio, GPS, ngrohësi i brendshëm dhe çdo pajisje tjetër që konsumon energji, të jetë e fikur.

Kushtoni rëndësi edhe zhurmës gjatë tentimit të ndezjes. Nëse zhurma dobësohet, bateria është gati të harxhohet apo veçse është harxhuar dhe ajo çfarë duhet bërë pastaj është që përmes kabllove ta lidhni me akumulatorin e një makine tjetër. Pasi të jetë mbushur paksa, bateria juaj do të jetë në gjendje të ndizet sërish.  

Blok ngrohësi

Për ta ndezur motorin e veturës gjatë ditëve të ftohta të dimrit, është mirë që vetura juaj të ketë të instaluar blok ngrohës. Ai e ngroh ftohësin e makinës si dhe nuk lejon që lëngjet në motor të ngrihen. Në kohën e sotme kur kemi aplikacione të shumta për parashikimin e motit, është mirë që të jeni të kujdesshëm dhe ta përcillni motin, në mënyrë që në ditët e ftohta ta aktivizoni blok ngrohësin. Në rast se veç është bërë mjaft ftohtë dhe keni harruar ta aktivizoni atë, atëherë që prej momentit të aktivizimit, për ta arritur efektin, blok ngrohësit do t’i duhen 30 deri në 60 minuta.  

Gazi

Nëse vetura juaj është paksa më e vjetër dhe ka motor me karburator, jepni gaz pak më shumë se zakonisht por mos e teproni. Nëse e ndieni aromën e karburantit, atëherë ka gjasa që ta keni mbushur motorin me karburant.

Ndërsa nëse e keni veturën më të re se viti 1995, mos e shtypni pedalin e gazit gjatë ndezjes, sepse sistemi i injeksionit e furnizon vet motorin me karburant të mjaftueshëm në bazë të temperaturës.