Në një pikë të caktuar, pothuajse çdo pronar veture bëhet shitës. Por kur është koha më e mirë për ta shitur veturën tuaj? Janë disa faktorë që duhen shikuar lidhur me kohën e duhur për shitjen e veturës dhe jo të gjithë prej tyre kanë të bëjnë me paratë.
Ekspertët thonë se koha më e mirë për ta shitur veturën është stina e pranverës dhe e verës. Megjithatë ka edhe shumë faktorë të tjerë që ndikojnë të vendosim për kohën e shitjes së veturës sonë.
A do t’ia shisni veturën ndonjë personi privat, apo do ta ndërroni me një makinë tjetër dhe të shtoni para në ndonjë auto sallon? Sa do të investoni në rregullimin e prishjeve para se ta nxirrni në shitje makinën tuaj? A do ta riparoni plotësisht?
Ju duhet ta hulumtoni për vlerën e makinës suaj në treg dhe të shikoni se në çfarë gjendje po e shisni.
Ja kohët më të mira për ta shitur veturën tuaj:
1. Para se të keni nevojë
Mund t’ju duket e çuditshme, por koha më e mirë për ta shitur veturën tuaj është para se të keni nevojë ta shisni atë ngase kështu do t’i krijoni komoditet vetes që të mendoni mirë se për çfarë makine keni nevojë dhe t’i shqyrtoni mirë dhe pa u ngutur opsionet që i keni për të blerë një makinë të re. Mos lejoni që vendimi për shitjen e makinës të ndikohet nga prishjet e ndryshme. Nëse ju vendosni ta shisni veturën tuaj sepse ka nevojë për një riparim të madh e të kushtueshëm, keni një problem financiar apo diçka tjetër në jetë që iu detyron ta shisni veturën, ju mund të gaboni rëndë pasi këto rrethana nuk janë koha më e mirë për ta shitur veturën, pasi do të humbë shumë vlerë.
2. Kur gjithçka punon mirë dhe s’ka nevojë për riparim
Një kohë e mirë për ta shitur veturën është kur ajo punon mirë dhe nuk ka nevojë për riparim. Vendoseni veten në pozitën e blerësit! A do të tentonit që t’ia zbrisni çmimin shitësit në vlerën e prishjeve që i ka makina dhe investimeve që duhen bërë në të? Po kështu do të veprojnë edhe blerësit potencialë të veturës suaj, nëse veçse nuk janë larguar prej jush akoma pa bërë ofertë.
Ju po ashtu mund të hulumtoni online në forume dhe rrjete sociale se çfarë po kërkojnë blerësit. Nëse ata duan një veturë me rreth 200 000 kilometra të kaluara, ndërsa vetura juaj i ka 180 000 (si e gjithë shqiptarëve), kjo është koha më e mirë për ta shitur atë.
3. Kur të jetë sezoni i shitjes së veturave
Ekspertët thonë se koha më e mirë për ta shitur veturën është stina e pranverës dhe e verës, pasi edhe blerësit edhe shitësit, të gjithë janë në treg gjatë kësaj kohe. Ndërkohë gjatë sezonit të dimrit, njerëzit kanë më shumë shpenzime për t’u ngrohur nga i ftohti dhe për shkak të festave të ndryshme, ata nuk e kanë komoditetin për të blerë veturë.
4. Kur keni nevojë për një veturë tjetër, apo fare nuk keni nevojë për veturë
Ka shumë arsye pse vetura mund të mos i plotësojë kërkesat dhe nevojat tuaja. Mund të jetë veturë e madhe për ju, apo shumë e vogël (pasi të jenë lindur fëmijët), apo është shumë e shtrenjtë për buxhetin tuaj? Nëse ngjarjet jetësore ju bëjnë të keni nevojë për tjetër lloj veture, sepse vetura aktuale i plotëson më nevojat tuaja, atëherë kjo mund të jetë koha e duhur për ta shitur atë.
Në anën tjetër, edhe mbajtja e veturës së prishur në garazhë, apo e veturës qe nuk e vozisni shpesh mund të jetë e kushtueshme për juve. Pa marrë parasysh sa e vozisni makinën tuaj, ju prapë duhet të paguani për regjistrimin e makinës, sigurimin dhe taksat e ndryshme. Nëse makina juaj vetëm rri e papërdorur, ajo do të humbë vlerë gjatë gjithë kohës.
5. Para se të bëjë shumë kilometra
Nëse vetura juaj është pranë bërjes së një numri të caktuar kilometrash, është ide e mirë që ta shisni veturën tuaj. Shumë prej vozitësve e dinë se kur vetura i kalon 100 000 kilometra, ajo humbë vlerë. Por ky nuk është faktori i vetëm që ia humbë vlerën makinës suaj. Vlera bie edhe kur veturës suaj i është afruar fundi i garancionit të prodhuesit.
6. Para se të bëhet edhe një vit më i vjetër
Kilometrazhi nuk është faktori i vetëm që ia humbë vlerën veturës suaj, por janë edhe vitet që kalojnë. Ju mund të fitoni më shumë para nga shitja e veturës suaj para se të dalë në treg ndonjë model i ri i ndonjë prodhuesi të njohur se sa pasi të del në treg ai model. Blerësit që qëndrojnë mirë financiarisht, gjithmonë kërkojnë të blejnë një veturë një vit më të re se sa një vit më të vjetër.
Po ashtu, është me rëndësi ta kuptoni se viti i modelit të veturës nuk përshtatet me vitin kalendarik. Nëse dëshironi ta shisni veturën para se ajo ta ketë ditëlindjen, koha më e mirë për këtë gjë do të ishte fundi i verës, e jo fundi i vitit.