Për gjithë ata që jetojnë në vende me dimër të ftohtë, me borë dhe akull, gomat e dimrit janë të pashmangshme. Madje, varësisht nga vendi, ngasësit obligohen edhe me ligj që në veturat e tyre t’i vendosin gomat e dimrit gjatë një periudhe të caktuar të vjeshtës dhe dimrit.
Gomat e dimrit padyshim janë një investim që ia vlen të mos kursehet ngase në momente të rrezikshme ato edhe mund t’jua shpëtojnë jetën, apo t’ju shpëtojnë nga aksidentet me dëme të mëdha materiale. Ato janë të dizajnuara që t’ju ndihmojnë të ngjiteni aty ku veturat tjera me goma normale do të rrëshqisnin e do të dilnin nga rruga.
Përveç gomave të veçanta për dimër, ka edhe goma që janë të kombinuara për gjithë vitin (all season), por ekspertët thonë se ato mund të jenë të përshtatshme vetëm gjatë kohës sa janë të reja për një dimër mesatar, e jo shumë të ashpër. Duke u prodhuar me qëllim që të jenë të përshtatshme për të gjitha stinët, ato i plotësojnë vetëm pjesërisht nevojat e vozitjes në dimër. Këto goma nuk do t’ju ndihmojnë në kushte me dimër më të ashpër, sepse ngjitja e gomës në rrugë me borë apo akull nuk është e mjaftueshme për të mos rrëshqitur.
Gomat cilësore të dimrit janë krijuar për ta rritur kapjen e gomës me sipërfaqen e tokës në kushte të ftohta, me borë, akull, apo edhe mot të thatë.
Sigurisht, gomat e dimrit nuk janë magjike. Megjithëse ato na japin më shumë siguri, ato nuk mund t’i tejkalojnë ligjet e fizikës nëse ju i tejkaloni mundësitë e tyre.