Këshilla për blerje të veturës – planifikoni me kujdes buxhetin!

Nëse keni vendosur për të blerë veturë, fillimisht duhet të hulumtoni për vetura të cilat i plotësojnë nevojat tuaja, qoftë ajo veturë më e vogël ekonomike, familjare apo me motor më të fuqishëm të cilat janë më të kushtueshme.

Pasi t’i keni analizuar dhe identifikuar nevojat tuaja, duhet të siguroheni që të kërkoni veturë që i përshtatet mundësive dhe buxhetit tuaj financiar.

Duhet t’i shikoni të ardhurat tuaja mujore dhe të planifikoni se sa mund të shpenzoni në blerjen e veturës për të cilën keni nevojë. Shumë prej blerësve, i identifikojnë nevojat e tyre, por pastaj joshen nga një veturë më e mirë apo duan ndonjë pjesë ekstra në atë veturë (për të cilën ndoshta nuk kanë nevojë) dhe shpenzojnë më shumë se sa kanë planifikuar duke krijuar pastaj probleme financiare.

Nëse keni të ardhura të qëndrueshme, ndoshta edhe mund t’ia lejoni vetes marrjen e ndonjë borxhi, por vetëm nëse jeni të sigurt se mund t’ia ktheni me kohë paratë personit të cilit ia keni marrë hua. Në të kundërtën, është më mirë ta frenoni veten dhe të vazhdoni të kurseni edhe pak derisa t’i krijoni mundësitë për blerjen e veturës.

Vërtetë mund të mendoni se kjo veturë është e veçantë dhe nuk do të gjeni veturë si kjo, por pikërisht ky është kurthi në të cilin bien shumë njerëz dhe pastaj duke pasur probleme financiare, nuk mund të kënaqen as me veturën e ëndrrave. Mos u shqetësoni! Nuk do të mbeteni pa veturë, do të gjeni ndonjë veturë tjetër të njejtë apo të ngjashme.

Përderisa keni pritur kaq gjatë për të blerë veturë, është më mirë të prisni edhe pak dhe ta blini veturën e duhur me buxhetin e duhur se sa të merrni një vendim të ngutur që do të ketë pasoja në financat tuaja personale dhe familjare.