Marrja e një çmimi të volitshëm për veturën që ju intereson fillon qysh disa javë para se të shkoni tek shitësi, kompanitë apo auto sallonet e ndryshme. Ju duhet të jeni i përgatitur dhe të gjeni sa më shumë informacione që mundeni për veturën të cilën e dëshironi.
Duke i marrë informacionet e nevojshme, ju do t’i njihni mirë kapacitetet e asaj veture dhe eventualisht do të jeni në gjendje që gjatë vozitjes testuese t’i vëreni defektet eventuale. Sigurisht, jo të gjithë e kanë aftësinë që ta vlerësojnë teknikisht se a është në rregull makina që doni ta blini. Andaj duke qenë se blerja e makinës nuk bëhet shpesh dhe është e kushtueshme, nuk është turp që ta merrni me vete ndonjë shok, mekanik apo ta dërgoni veturën në ndonjë servis për ta kontrolluar gjendjen.
Po ashtu përgatitja dhe marrja e informacioneve nënkupton edhe hulumtimin në treg për çmimin e atij modeli, që nga më i ulëti deri tek më i larti. Mandej varësisht prej gjendjes së veturës (nëse është e përdorur) do të dini edhe sa të ofroni për atë veturë.
Në shikim të parë, këto këshilla mund të duken mjaft të thjeshta, por në realitet ju mundësojnë që ta merrni një veturë që është në rregull teknikisht dhe njëkohësisht do të kurseni para që të mos paguani mbi çmimin e tregut.