Pastrojeni xhamin, qartësoni pamjen tuaj!

Para se ta vozisni një veturë të mbuluar me borë dhe me akull, është e domosdoshme që ta pastroni borën dhe akullin jo vetëm nga dritarja, por edhe nga pjesa e sipërme e veturës.

Drejtimi i automjetit të mbuluar me borë ose dritare të ngrira nga akulli nuk është vetëm i rrezikshëm, por është gjithashtu i paligjshëm në shumë vende. Duhen vetëm disa minuta kohë që ta pastroni dhe kjo mund t'ju shpëtojë nga ndonjë aksident i mundshëm.

Zakonisht ne e pastrojmë vetëm xhamat e veturës duke nënvlerësuar rëndësinë e largimit të borës nga pjesa e sipërmes e veturës. Por kjo mund të jetë shumë e rrezikshme sepse një frenim eventual mund të bëjë që bora të rrëshqasë e të bie mbi xham duke e mbuluar pamjen tuaj e potencialisht duke shkaktuar edhe ndonjë aksident.

Po ashtu është me rëndësi që të pastrohen dritat e automjetit tuaj që pjesëmarrësit tjerë në komunikacion t’ju shohin qartë e mos t’ju godasin. Nëse vetura juaj ka edhe kamerë, mos harroni ta pastroni edhe hapësirën e saj që të siguroni pamje sa më të mirë prapa.

Gjithashtu mbani edhe furça dhe pajisjet e nevojshme për pastrimin e borës dhe akullit nga automjeti juaj në mënyrë që mos ta përdorni letërnjoftimin apo kredit kartelën si pastrues xhamash.