Kujdes pastrimin e xhamave gjatë mëngjeseve të ftohta!

Megjithëse moti po shkon duke u përmirësuar, akoma ka ditë në të cilat mëngjeset janë të ftohta, e si rezultat xhamat e veturave tona janë ngrirë.

Pastrimi i tyre dhe heqja e akullit nganjëherë di të jetë i vështirë e i mundimshëm dhe të merr kohë, ndërsa vozitja me xhama të ngrirë në shumë vende të botës madje konsiderohet ilegale. Disa njerëz mendojnë se hedhja e ujit të nxehtë në xham do ta shkrinte atë më shpejtë pa u munduar shumë.

Përkundrazi, kjo mund të jetë shumë e rrezikshme. Çfarëdo që të bëni, assesi mos hidhni ujë të nxehtë mbi xhama duke menduar se do ta shkrini akullin. Uji i nxehë mund të bëjë që të kriset ndonjë pjesë e xhamit të veturës suaj si shkak i ndryshimit të shpejtë të temperaturës dhe pastaj të zmadhohet ajo e krisur në gjithë xhamin tuaj. Andaj kujdes dhe assesi mos i hidhni ujë të nxehtë në xham kur mëngjeset janë të ftohta.

Si zgjidhje, mbani “spray” me përzierje të kimikateve kundër ngrirjes për ta pastruar xhamin më lehtë apo me pajisjet tradicionale për pastrimin e xhamave si furçat dhe gërryesit.