Prej 2018, mbi 80% e automjeteve janë regjistruar me vonesë

Nga fillimi i vitit 2018 e deri më tash, mbi 80% të veturave në vendin tonë janë regjistruar me vonesa. Kështu bëhet e ditur nga iSIGURIME e cila njofton se vonesat në regjistrime janë bërë nga 5 ditë deri në 365 ditë.

Sipas Shoqatës së Sigurimeve të Kosovës, numri i madh i automjeteve të paregjistruara paraqet rrezik serioz për pjesëmarrësit në komunikacion, për shkak se këto automjete janë të pa kontrolluara teknikisht. Njëkohësisht nga kjo shoqatë theksojnë edhe buxheti i Kosovës humb të hyra të konsiderueshme të parave nga mos pagesa e taksave të parapara me ligj.

Por në anën tjetër qytetarët ankohen se shpenzimet e regjistrimit të automjetit bashkë me sigurimin janë aq të larta sa që detyrohen që ta shtyjnë regjistrimin për shkak të pamundësisë financiare. Gjithashtu disa nga qytetarët që po i regjistronin veturat se shtyrja e regjistrimit të automjetit është e drejtë e tyre nëse duan apo jo ta regjistrojnë si shkak i pamundësive financiare dhe se regjistrimi nuk duhet kushtëzuar menjëherë pas skadimit të regjistrimit paraprak. “Është diçka tjetër të vozisësh pa regjistrim dhe sigurisht se këto automjete nuk duhet të jenë pjesë e komunikacionit, por nëse qytetarët nuk i regjistrojnë automjetet dhe nuk janë pjesëmarrës në komunikacion e nuk e rrezikojnë askënd, atëherë këtu s’ka asgjë të keqe nga shtyrja e regjistrimit deri në krijimin e mundësive financiare”, shprehet një qytetar që dëshiroi të mbetet anonim.

Sipas iSIGURIME, gjatë vitit të kaluar 4 065 automjete janë regjistruar me 365 ditë vonesë, ndërsa 10 750 automjete tjera janë regjistruar me 180 ditë vonesë, ndërsa vetëm 60 187 (20.48% të automjeteve) janë regjistruar me kohë.

Më poshtë e keni tabelën e vonesave në regjistrim sipas Shoqatës së Sigurimeve të Kosovës.