Tregu i automjeteve në Bashkimin Evropian ka shënuar një rënie dramatike vjetore prej 55% në regjistrimet e reja të automjeteve gjatë muajit mars për shkak të përhapjes së pandemisë globale COVID-19.
Sipas Shoqatës Evropiane të Prodhuesve të Automjeteve (ACEA), për shkak të masave të izolimit që po mbahen në shumë vende, shumica e tregjeve evropiane u mbyllën gjatë gjysmës së dytë të muajit Mars. Si pasojë, numri i automjeteve të regjistruara u përgjysmua nga 1,264,567 automjete sa ishin në vitin 2019, në 567,308 automjete të regjistruara.
Të gjitha tregjet e Bashkimit Evropian u goditën rëndë, por më së shumti e pësoi Italia që pati rënie të automjeteve të regjistruara prej 85.4%, ku vetëm 28,326 automjete u regjistruan nga 194,302 sa ishin të regjistruara në mars të vitit 2019. Një rënie të madhe regjistrimesh pati muajin e kaluar edhe në Francë (-72.2%) dhe Spanjë (-69.3%). Gjermania regjistroi një rënie më pak ekstreme sesa tregjet e tjera kryesore, por megjithatë regjistrimet u ulën për 37.7%.
Për shkak të ndikimit të pandemisë globale Covid-19, që nga Janari deri në Mars 2020, kërkesa për vetura të reja u ul për 25.6% në BE, ku të secila nga tregjet e mëdha raportoi humbje të mëdha. Në këto të dhëna janë përfshirë 27 shtete anëtare, duke përjashtuar Britaninë e Madhe.