Jo rrallëherë si shkak i shiut, rrugët mund të mbushen me ujë, apo të paktën në pjesë të caktuara të rrugës mund të grumbullohet uji më shumë. Në këso kushte duhet të bëni kujdes që të mos hyni me shpejtësi në pjesët e rrugës ku është grumbulluar uji qoftë edhe nëse nuk është shumë sasi e madhe apo thellësi.
Është më mirë që në këto rrethana të ngadalësoni dhe të mos bëni manovrime apo ta ndryshoni shpejtësinë ngase nëse vozisni shpejtë ekziston mundësia që uji të futet në sistemin e ndezjes së veturës dhe ta ndalë motorin. Po ashtu kur hyni me shpejtësi në një pellg, vetura mund ta humb kontrollin, andaj mos frenoni vrullshëm dhe mos e ndryshoni shpejtësinë. Pastaj provojini frenat duke e shkelur pedalen e frenit disa herë ngase fërkimi shkakton nxehtësi duke bërë që lagështia të largohet nga frenat e veturës suaj.