Edhe pse BMW nxori në shitje disa modele të reja veturash, kompania e mirënjohur gjermane megjithatë po përballet me një krizë si shkak i pandemisë globale Covid-19.
Ndërsa sipas ‘Automotive News Europe’ kompania ka vendosur që t’i shkurtojë 5 000 vende pune. Por kjo nuk do të jetë e lehtë për BMW-në pasi marrëveshjet e ndryshme të sindikatave mund të fillojnë. Lajmi u bë i ditur pasi një mesazh i brendshëm i Drejtorit Financiar, Nicolas Peter u përhap në media, e që më vonë u konfirmua si lajm i vërtetë edhe nga vet BMW.
Megjithëse janë ndërmarrë masa të mëhershme që të reduktohen shpenzimet duke ulur orët e punës vetëm e vetëm që të mbahen në punë të gjithë punëtorët aktualë, megjithatë kjo nuk do të jetë e mjaftueshme. Prandaj kompania do të ofrojë paketa pensioni të parakohshëm për ata që duan t’i pranojnë.
Në kushte normale, shumë punëtorë shkojnë e vijnë në këtë kompani, por në këtë kohë krize financiare si shkak i pandemisë, askush nuk dëshiron ta humbë vendin e punës.
Si për shumë prodhues makinash, kjo është një tjetër goditje për BMW që edhe ashtu gjatë këtyre ditëve u përball me numrin më të vogël të shitjeve si shkak i izolimit nga Covid-19 dhe ky trend i shitjeve të ulëta pritet të vazhdojë edhe në një kohë afatshkurtër.