Muzeu i kompanisë së mirënjohur gjermane Mercedes Benz është rihapur për publikun, pasi gjatë kohës së pandemisë globale Covid-19 kishte qëndruar i mbyllur.
Kështu ka bërë të ditur kompania përmes një postimi në Twitter, në të cilin ajo publikoi njoftimin për rihapjen e muzeut dhe konceptin imagjinar të veturës Mercedes Benz F 200 të vitit 1996. Atëkohë kompania pati testuar drejtimin e makinës me ‘joystick’, ndërsa inovacionet tjera përfshinin monitorët në djathtë dhe në të majtë për t’u përdorur në vend të pasqyreve të jashtme anësore.
Pas rihapjes, fillimisht vizitat në këtë muze do të jenë të mundura vetëm prej të premtes deri të dielën nga ora 09:00-18:00, ndërsa muzeu do të vazhdojë të qëndrojë i mbyllur prej të hënës deri te enjten.
Në nëntë nivele dhe me një hapësirë prej 16.500m² të ndara në 12 hapësira, muzeu paraqet automjete që të lënë pa frymë, që nga makina e parë e patentuar në botë, deri tek makinat me hidrogjen të këtij mijëvjeçari. Po ashtu mund të gjenden edhe mbi 1.500 ekspozita, ndërsa të gjitha hapësirat e muzeut mund të vizitohen për dy orë.
Muzeu i Mercedes-Benz në Stuttgart feston shpikjen e automobilit nga Carl Benz në 1886 ku ndërlidhen historia dhe ngjarjet e këtij modeli, duke i sjellë të dyja të vendosura në kontekstin e teknologjisë, jetës së përditshme, historisë sociale dhe kulturës popullore. Më shumë se 160 automjete të të gjitha llojeve janë protagonistët kryesorë të këtij muzeu, që nga automobilat më të vjetër ndonjëherë deri te makinat legjendare të garave dhe kërkimet e hulumtimet për automjetet futuriste.